Estatutos

CAPÍTULU I

DENOMINACIÓN, FINES, DOMICILIU, Y ÁMBITU

ARTÍCULU 1.- Cola denominación d’ACADEMIA DEL CINE ASTURIANO , constitúise per tiempu indefiníu nel conceyu de Xixón una Asociación ensin ánimu de llucru al abellugu de la Llei Orgánica 1/2002, de 22 de marzu, reguladora del Derechu d’Asociación y normes complementaries, con capacidá xurídica y capacidá dafechu d’obrar. 

ARTÍCULU 2.- L’Asociación tien los fines siguiente:

  1. Axuntar les persones profesionales del sector creativu, técnicu y de producción cinematográfica d’Asturies pa dar una identidá a les nueses producciones cinematográfiques.
  2. Aunar el sector cinematográficu asturianu.
  3. Promocionar, esparder y dar prestixu al cine asturiano en tol territoriu, énte los medios de comunicación y el públicu en xeneral.
  4. Facer, editar y esparder estudios y trabayos científicos, artísticos y técnicos rellacionaos cola cinematografía y artes asemeyaes que la Xunta Directiva cuide afayadizos
  5. Afalar la investigación, asistencia y l’intercambiu d’información científica, artística y técnica en materia cinematográfico ente los miembros, lo mesmo que con entidaes asemeyaes estatales o estranxeres.
  6. Impulsar l’anovación, la formación continua, el desendolque y perfeccionamientu de les estremaes especialidaes rellacionaes directa o indirectamente col sector cinematográficu asturianu.
  7. Fomentar na infancia y na mocedá programes qu’avere a éstos al conocimientu de los oficios del audiovisual y al so análisis críticu.
  8. Esixir una política de recursos públicos pal fomentu y l’afitamientu de la cinematografía asturiana.
  9. Facilitar a l’Alministración Pública los informes que-y pidan sobro materies rellacionaes cola producción cinematográfica, amás de proponer a la mesma iniciatives que l’Academia cuide acionaes.
  10. Intervenir na redacción y aprobación de tolos elementos llexislativos y normativos oficiales qu’afecten al cine en cualesquiera de les sos acepciones.
  11. Cualesquier otra actividá que busque elevar el nivel artísticu, técnicu o científicu de los sos miembros y aguiyar el de los ciudadanos dando a les artes cinematográfiques asturianes el nivel artísticu que merecen y la constructiva collaboración ente l’Alministración Pública y les persones rellacionaes con estes artes

ARTÍCULU 3.- Pal cumplimientu d’estos fines fadránse les actividades siguientes:

  1.     Organización de talleres, práctiques, conferencies, alderiques, seminarios, proyecciones, foros de discutiniu, esposiciones, concursos, escursiones, visites, práctiques de llaboratoriu y toa mena d’investigaciones qu’afecten al ámbitu cinematográficu, lo mesmo qu’enseñances y demostraciones colectives o individuales.
  1.     Realización d’eventos de trabayu collaborativu  ente les persones profesionales del sector.
  1.   Organización d’alcuentros o ciclos pa promover la cinematografía asturiana en tol mundu ya internacionalizar el cine asturiano.
  1.   Establecer venceyos con otres academies cinematográfiques ya instituciones culturales de tol mundu.
  1.     Crear sinerxes con entidaes culturales y artístiques d’Asturies y tol mundu.
  1.     Coordinar y collaborar colos estremaos organismos y departamentos del Gobiernu del Principáu d’Asturies implicaos na promoción y producción del cine asturiano pa optimizar los recursos.
  1.   Intervenir na redacción y aprobación de tolos elementos llexislativos y normativos oficiales qu’afecten al cine en cualesquiera de les sos acepciones.
  1.   Intervenir na política de subvenciones o polítiques cinematográfiques.
  1.     Encontu y desendolque de campañes de sensibilización sobro la importancia del cine y la dignificación de les persones profesionales del sector.
  1.     Facer, editar y esparder estudios y trabayos científicos, artísticos y técnicos rellacionaos cola cinematografía y artes asemeyaes que la Xunta Directiva cuide afayadizos.
  1.     Editar publicaciones de referencia coles conclusiones de los distintos estudios.
  1.     Fomentar l’anovación ente los profesionales de tolos ámbitos del sector cinematográficu.
  1.   Dar premios y reconocencia a les obres y miembros destacaos de la cinematografía asturiana.
  1.   Cualesquier otra que s’afaye al cumplimientu del oxetu y de les finalidaes pa les que se creó l’Academia.

ARTÍCULU 4.- L’Asociación establez la sede social na llocalidá de Xixón, nel  Hotel d’Asociaciones  del Conseyu de la Mocedá de Xixón, asitiáu na Avenida  Manuel Llaneza, númberu 68 y códigu postal 33208  y l’ámbitu territorial nel que realizará principalmente les sos actividaes ye prioritariamente’l Principáu d’Asturies, ensin perxuiciu que pal  cumplimientu de les sos finalidaes pudiera tener actividá n’otros ámbitos territoriales estatales ya internacionales.

Los presentes Estatutos cumpliránse per aciu de los alcuerdos que válidamente adopten la Xunta Directiva y l’Asamblea Xeneral, dientro de les sos competencies respectives.

 

CAPÍTULU II

MUÉRGANOS DE REPRESENTACIÓN

ARTÍCULU 5.- L’Asociación sedrá xestionada y representada por una Xunta Directiva, formada por un Presidente/a, un/una Vicepresidente/a, un/una Secretariu/a, un Tesoreru/a y pelo menos un/a vocal, designaos ente los asociaos mayores d’edá, en plenu usu de los sos derechos civiles y que nun tean incursos en motivos d’incompatibilidá establecíos llegalmente.

Va velase porque na Xunta Directiva heba paridá de xéneru, escepcionalmente doblando’l cargu de vicepresidencia o amestando vocalíes. Tolos cargos son gratuitos y nun habrán tener interés económicu nos resultaos de la entidá, por sí mesmos o al traviés de persona interpuesta. Sicasí, les persones qu’integren la Xunta Directiva y faigan otru tipu de trabayu pa l’Asociación (talleres, servicios profesionales, etc.) y que nun tengan que ver coles funciones propies del cargu, podrán percibir remuneración económica.

     ARTÍCULU 6.- La Xunta Directiva sedrá’l muérganu competente pa interpretar los preceptos conteníos nestos Estatutos y cubrir les sos llagunes, siempre sometiéndose siempre a la normativa llegal vixente en materia d’asociaciones.

     ARTÍCULU 7.- Los cargos que componen la Xunta Directiva designaránse y revocaránse pola Asamblea Xeneral Estraordinaria y el so mandáu tendrá un llargor de cuatro años, inda que puedan ser oxetu de reelección.

     ARTÍCULU 8.- Los miembros de la Xunta Directiva podrán causar baxa por renuncia voluntaria comunicada per escrito a la Xunta, por incumplimientu de les obligaciones que tuvieren encamentaes y por fin del mandáu.

     ARTÍCULU 9.- Los miembros de la Xunta Directiva qu’escosaren el plazu pal que foron escoyíos siguirán ostentando los sos cargos hasta’l momentu en que se produza l’aceptación de los que los sustituyan.

     ARTÍCULU 10.- La Xunta Directiva tendrá les sos sesiones cuantes vegaes determine’l so Presidente/a o Vicepresidente/a, a iniciativa propia o a pidimientu de la metá de los sos miembros.

Quedará constituyida cuando participen la metá más ún de los sos miembros y pa  que los sos alcuerdos seyan válidos habrán adoptase por mayoría de votos. En casu d’empate, el votu del Presidente/a sedrá votu calidable.

Sedrá presidida pol Presidente/a y, na so ausencia pol Vicepresidente/a, por esti orde, y, a falta d’entrambos dos, pol miembru de la Xunta que tenga más edá. El Secretariu/a llevantará acta, que se trescribiár nel llibru correspondiente.

     ARTÍCULU 11.- Facultaes de la Xunta Directiva:

     Les facultaes de la Xunta Directiva allárguense con calter xeneral, a tolos actos propios de les finalidades de l’Asociación, siempres que nun requieran, según estos Estatutos, autorización espresa de l’Asamblea Xeneral.

     Son facultaes particulares de la Xunta Directiva:

  1. a) Dirixir les actividaes sociales y llevar la xestión alministrativa y económica de l’Asociación, alcordando facer los contratos y actos acionaos.
  1. b) Executar los alcuerdos de l’Asamblea Xeneral.
  1. c) Formular y someter a l’aprobación de l’Asamblea Xeneral los balances y les cuentes añales.
  1. d) Resolver sobro l’almisión de nuevos asociaos.
  1. e) Nomar delegaos pa dalguna actividá determinada de l’Asociación.
  1. f) Cualesquier otra facultá que nun seya de la esclusiva competencia de l’Asamblea Xeneral de socios.

     ARTÍCULU 12.-  El Presidente/a de la Xunta Directiva ser tamién de l’Asociación, y tendrá les atribuciones vinientes:

  1. a) Representar llegalmente a l’Asociación énte toa mena d’organismos públicos o privaos.
  1. b) Convocar, presidir y llevantar les sesiones que celebren l’Asamblea Xeneral y la Xunta; tamién dirixir les deliberaciones d’una y otra, disponiendo de votu calidable nel casu de la Xunta.
  1. c) Ordenar los pagamientos alcordaos válidamente y autorizar cola so robla los documentos, actes y correspondencia.
  1. d) Adoptar cualesquier midida urxente que la bona marcha de l’Asociación aconseye o nel desendolque de les sos actividaes resulte afechisca o conveniente, ensin perxuiciu de dar cuenta darréu a la Xunta Directiva.

     ARTÍCULU 13.- El Secretariu/a tendrá a cargu la dirección de los trabayos puramente alministrativos de l’Asociación, espedirá certificaciones, llevará los llibros de l’Asociación llegalmente establecíos y el ficheru d’asociaos, y curiará la documentación de la entidá, faciendo que se cursen les comunicaciones sobro designación de Xuntes Directives y demás alcuerdos sociales inscribibles nos Rexistros correspondientes, como la presentación de les cuentes añales y el cumplimientu de les obligaciones documentales nos términos que llegalmente correspuendan.

     ARTÍCULU 14.- El Tesoreru/a dirixirá la contabilidá de l’Asociación, tomará razón y llevará cuenta de los ingresos y de los gastos, interviniendo les operaciones d’orde económicu; recaldará y curiará los fondos pertenecientes a l’Asociación, y dará cumplimientu a les órdenes de pagu qu’espida’l Presidente/a.

     D’igual mou formalizará’l presupuestu añal d’ingresos y gastos, según l’estáu de cuentes del añu anterior, qu’han presentase a la Xunta Directiva, pa qu’esta, igualmente, someta estos a l’aprobación de l’Asamblea Xeneral.

   ARTÍCULU 15.- Los Vocales tendran les obligaciones propies del so cargu como miembros de la Xunta Directiva, lo mesmo que les que surdan de les delegaciones o comisiones de trabayu que la mesma Xunta-yos encamiente.

  ARTÍCULU 16.- El Vicepresidente/a sustituirá al Presidente/a n’ausencia d’esti/a, motivada por enfermedá o cualesquier otra causa, y tendrá les  mesmes atribuciones qu’él/ella.       

N’ausencia temporal de secretariu/a o tesoreru/a, el/la presidente/a roblará por ellos y les sos funciones podrá delegales en dalguna persona perteneciente a l’Asociación.

ARTÍCULU 17.- Les vacantes que pudieren producise a lo llargo del mandáu de cualesquiera de los miembros de la Xunta Directiva cubriránse provisionalmente ente estos miembros hasta la elección definitiva per parte de l’Asamblea Xeneral Estraordinaria.

 

CAPÍTULU III

ASAMBLEA XENERAL

     ARTÍCULU 18.- L’Asamblea Xeneral, integrada por toles persones asociaes, ye’l muérganu supremu de gobiernu de l’Asociación.

     ARTÍCULU 19.- Les xuntes de l’Asamblea Xeneral sedrán ordinaries y estraordinaries. Obligatoriamente l’Asamblea habrá convocase en sesión ordinaria una vegada al añu, dientro del primer trimestre, p’aprobar el plan xeneral d’actuación de l’Asociación, censurar la xestión de la Xunta Directiva y aprobar, nel so casu, los presupuestos añales d’ingresos y gastos, al igual que l’estáu de cuentes correspondiente al añu anterior.

     L’Asamblea Xeneral aconceyará en sesión estraordinaria cuando les circunstancies lo aconseyen, a xuiciu del Presidente/a, cuando asina lo alcuerde la Xunta Directiva n’atención a los asuntos que tengan de tratase o cuando lo propongan per escrito un terciu de los asociaos.

 

  ARTÍCULU 20.- Les convocatories de les Asamblees Xenerales, seyan ordinaries o estraordinaries,  fadránse per escrito, espresando’l llugar, fecha y hora de reunión, y l’orde del día; tamién podrá facer constar que l’Asamblea aconceyará en segunda convocatoria media hora depués de la señalada pa la primera. Ente la convocatoria y el día señaláu pa la celebración de l’Asamblea habrá de mediar pelo menos diez díes.

ARTÍCULU 21.- Les Asamblees Xenerales,  lo mesmo les ordinaries que les estraordinaries, quedarán constituyíes  válidamente en primer convocatoria cuando tean nella, presente o representaos, un terciu de los asociaos con derechu a votu, y en segunda convocatoria cualesquiera que seya’l númberu d’asociaos concurrente con derechu a votu.

 Los alcuerdos adoptaránse por mayoría simple de les persones presentes o representaes, cuando los votos afirmativos superen a los negativos, nun siendo computables a estos efectos los votos en blanco nin les astenciones.

Precisaráse mayoría cualificada de les persones presentes o representaes, que resultará cuando los votos afirmativos superen la metá, pa l’adopción de los siguientes alcuerdos:

  1. a) Modificar estos Estatutos.
  2. b)   Disponer o enayenar bienes.
  3. c) Nomar Xuntes Directives y Alministradores.
  4. d) Pidir la declaración d’utilidá pública de l’Asociación.
  5. e) Alcordar la constitución d’una Federación d’Asociaciones o l’inxertamientu nella.

Sedrá necesaria mayoría cualificada de dos tercios de los asociaos pa l’adopción del alcuerdu de disolución de l’Asociación.

ARTÍCULU 22.- Son facultaes de l’Asamblea Xeneral Ordinaria:

  1. a) Aprobar, nel so casu, la xestión de la Xunta Directiva.
  2. b) Esaminar y aprobar les cuentes añales.
  3. c) Aprobar o refugar les propuestes de la Xunta Directiva n’orde a les actividaes de l’Asociación.
  4. d) Afitar les cuotes ordinaries o estraordinaries.
  5. e) Cualesquier otra que nun seya de la competencia esclusiva de l’Asamblea Xeneral Estraordinaria.

ARTÍCULU 23.- Son facultaes de l’Asamblea Xeneral Estraordinaria, y tendrá de convocase con carácter estraordinariu, les que vienen darréu:

  1. a) Nomar a los miembros de la Xunta Directiva.
  2. b) Modificar los Estatutos.
  3. c) Disolver l’Asociación.
  4. d) Espulsar  socios.
  5. e) Constituir Federaciones o inxertase nelles.

CAPÍTULU IV

SOCIOS/ES

ARTÍCULU 24.- L’ingresu na Asociación podrá solicitase por cualesquier persona física con capacidá d’obrar que tenga interés nel desendolque de los fines de l’Asociación, por aciu d’escritu empobináu al so Presidente/a, que dará cuenta a la Xunta Directiva,  qu’aceptará o refugará l’almisión.

A tolos efectos, nun s’algama la condición d’asociáu/ada mentanto nun se satisfaigan los derechos o cuota d’entrada, na contía y forma qu’estableza l’Asamblea Xeneral.

Pueden formar parte de l’Academia les persones físiques nacíes n’Asturies, o con residencia y actividá profesional xustificada n’Asturies, interesaes nel oxetu y finalidaes de la mesma que cumplan los requisitos siguientes:

  1.   Tener capacidá d’obrar;
  1.   Ser mayor d’edá. Nel casu de menores de 18 años, podrá adquirir la condición d’Asociáu/ada, cuntando col consentimientu de los padres o tutores, y asistir a les Asamblees con voz pero ensin votu. En nengún casu podrán ser escoyíos miembros de la Xunta Directiva.
  1.   Pertenecer al sector cinematográficu y cumplir los requisitos específicos del ARTÍCULU 25.

A proposición de miembros de l’Asociación la Xunta Directiva podrá valorar l’almisión d’otros profesionales y/o entidaes non contemplaos nestos estatutos.

ARTÍCULU 25.-
TIPOS DE SOCIOS/ES

Les/os socies/o clasifíquense nes categoríes vinientes:

  1. a) Académicos/ques. Que tendrán voz y votu na Asamblea y podrán ser escoyíos/es pa formar parte de la Xunta Directiva.
  2. b) En réxime transitoriu o menores d’edá: Asociaos/es. Que tendrán voz na Asamblea y nun podrán ser escoyíos pa formar parte de la Xunta Directiva.
  3. c) Académicos/ques d’Honor. Con voz na Asamblea.

Los requisitos p’acceder a caúna d’estes categoríes son los siguientes:

a) Académicos/ques:

Acreitar esperiencia nel sector cinematográficu participando pelo menos en dos obres cinematográfiques estrenaes en festivales internacionales o dos obres rexistraes nel ICAA o entidá asemeyada.
Alternativamente, ser nomináu/ada a dalgún de los premios añales de les Academies de cine del mundu.
Escepcionalmente, el/la profesional que esendolque una actividá dientro del sector cinematográficu o audiovisual, non descrita nel puntu 1 pero que, a xuiciu de la Xunta Directiva, amerite selo: inclúise nesti supuestu xestores institucionales, programadores, críticos o profesores universitarios, lo mesmo qu’instituciones públiques rellacionaes col sector cinematográficu, ente otros. Requier l’aprobación de la Xunta Directiva, por mayoría simple.

b) Académicos/es d’Honor:

Ser una distinguida personalidá de la profesión cinematográfica que rescample por una llarga trayectoria creativa y d’éxitu; y, nesti casu:

  1. Ser propuestu a la Xunta Directiva, acompañando la so propuesta d’una rellación de méritos y condiciones que faigan al candidatu/a merecedor/a d’esta condición;
  2. Cuntar cola aprobación de la mayoría de la Xunta Directiva,conformada poles dos terceres partes de los sos miembros.

c) Amigos – Asociaos/as:

Los/es Amigos/es, Asociaos/es son una categoría de transición p’aquelles persones interesaes en pertenecer a l’Academia y qu’entá nun cumplen los requisitos necesarios pa ser Académiques.

Los Asociaos van poder solicitar a la Xunta Directiva, presentando la documentación que se-yos requiera, la valoración de cambiu de categoría para pasar a ser miembros Académicos con voz y votu.

ARTÍCULU 26. Los socios causarán baxa por dalguna de les causes siguientes:

a)   Por renuncia voluntaria, comunicada per escrito a la Xunta Directiva. Sicasí, ésta nun tendrá calter definitivu hasta que pase un mes, a partir de la presentación de la solicitú.

b)   Por incumplimientu de los principios de l’Asociación y/o les obligaciones económiques, siempre y cuando nun xustifiquen motivu a satisfaición de la Xunta Directiva.

ARTÍCULU 27.- Los miembros de l’Asociación  gociarán de los derechos siguientes:

a)   A participar en cuantes actividaes sociales entame l’Asociación en cumplimientu de los sos fines.

b)   A ser electores y escoyibles pa los cargos directivos, y, poro, a exercer el derechu de votu, igual qu’a asistir a l’Asamblea Xeneral, acordies colos Estatutos.

c)   A ser informáu/ada sobro la composición de los muérganos de gobiernu y representación de l’Asociación, del so estáu de cuentes y del desendolque de la so actividá.

d)   A tener un exemplar d’estos Estatutos y recibir información de los alcuerdos apautaos polos muérganos de l’Asociación.

e)   A facer usu de la insinia o emblema que l’Asociación cree como distintivu de los sos socios.

f)     A ser escucháu con calter previu a l’adopción de midíes disciplinaries contra él y a ser informáu de los fechos que dean llugar a tales midíes, teniendo de ser motiváu l’alcuerdu que, nel so casu, imponga la sanción.

g)   A recurrir a la Xunta Directiva cuando estimen que se vulneraren los sos derecho, ensin perxuiciu de la impugnación d’alcuerdos que puedan formular llegalmente.

ARTÍCULU 28.- Sedrán obligaciones de toles/os socies/os:

a)   Cumplir los presentes Estatutos y los alcuerdos válidos adoptaos poles Asamblees Xenerales y pola Xunta Directiva

b)   Compartir les finalidaes de l’Asociación y collaborar pal llogru d’estes.

c)   Desempeñar, nel so casu, les obligaciones inherentes al cargu qu’ocupen.

d)   Pagar les cuotes, derrames y otres aportaciones que, acordies colos Estatutos, puedan corresponder a cada sociu.

e)   Cumplir el restu d’obligaciones que resulten de les disposiciones estatutaries.

f)     Acatar y cumplir los acuerdos válidamente adoptaos polos órganos de gobiernu y representación de l’Asociación.

ARTÍCULU 29.- Los miembros de l’Asociación va poder recibir les sanciones a les que se faigan acreedores por incumplimientu dolosu de les sos obligaciones. Estes sanciones podrán dir dende la perda de los sos derechos un mes como mínimu hasta la xebradura definitiva de l’Asociación. Sicasí, nun podrá ser dixebráu de la mesma nengún/a sociu/a ensin antes intruyise espediente sancionador, nel qu’habrá ser escucháu.

 

CAPÍTULU V

RÉXIME ECONÓMICU, CONTABILIDÁ Y DOCUMENTACIÓN

ARTÍCULU 30.- Los recursos económicos previstos pal desendolque de los fines y les actividaes de l’Asociación sedrán los que vienen darréu:

a)   Les cuotes d’entrada, periódiques o estraordinaries.

b)   Los productos de los bienes y derechos que correspuendan en propiedá, lo mesmo que les subvenciones, llegaos y donaciones que pueda recibir en forma llegal.

c)   Los ingresos que llogre per aciu de les actividaes llícites qu’alcuerde la Xunta Directiva o l’Asamblea acordies coles sos competencies.

Los beneficios llograos pola Asociación, derivaos del exerciciu d’actividaes económiques, incluyíes les prestaciones de servicios, tendrán que se destinar, esclusivamente, al cumplimientu de los sos fines, ensin que quepa en nengún casu’l so repartu ente los asociaos nin ente los sos cónxuxes o persones que convivan con aquellos con análoga rellación d’afeucividá, nin ente los sos parientes, nin la so cesión gratuita a persones físiques o xurídiques con interés llucrativu.

ARTÍCULU 31.- l’Asociación nun tien patrimoniu fundacional

ARTÍCULU 32.- L’exerciciu asociativu y económicu sedrá añal y el so pieslle tendrá llugar el 31 d’avientu de cada añu.

ARTÍCULU 33.- l’Asociación llevará una contabilidá que-y dexe llograr la imaxe fiel del patrimoniu, de la resultancia y de la situación financiera de la entidá, lo mesmo que de les actividaes feches. La contabilidá llevaráse acordies cola normativa que-y resulte d’aplicación.

ARTÍCULU 34.- l’Asociación dispondrá, amás, de los llibros de contabilidá, d’una rellación actualizada d’asociaos, del inventariu de los sos bienes y de llibru de les actes de les xuntes de los sos muérganos de gobiernu y representación.

CAPÍTULU VI

DISOLUCIÓN

ARTÍCULU 35.- l’Asociación disolveráse por mor de les causes vinientes:

  1.   Voluntariamente cuando asina lo alcuerde l’Asamblea Xeneral Estraordinaria, convocada al efectu, por una mayoría de dos tercios de los asociaos.
  2.   Poles causes determinaes nel artu 39 del Códigu Civil.
  3.   Por sentencia xudicial firme.

ARTÍCULU 36.- En casu de disolución de l’Asociación nomaráse una comisión lliquidadora, que se fadrá cargu de los fondos qu’esistan y, en satisfaciendo les deldes, el remanente, si lo hubiere, destinara´se pa fines que nun desvirtúen la so naturaleza non llucrativa, concretamente como donativu a una Asociación con ámbitu d’actuación asemeyáu.

Comentarios cerrados.